|
Eis o programa:
O PAIASO TROMPO
TOLO
Coma sempre, un
ano máis, a asociación xuvenil Berbés considera
oportuno sementar sorrisos entre os máis pequechos
para acabar gozando co saber do povo. Nesta ocasión
temos un convidado de luxo, Rodolfo Cruz, que
chega dende as azuladas augas do mar que baña
as terras cubanas. O humorista tras-oceánico segue
a sementar pequenas nariciñas encarnadas alá por
onde pasa, agasallando ilusión cos títeres e os
zancos, facendo que o tempo se deteña ao carón
dos sorrisos de futuro das nosas crianzas. Na
Casa da Cultura de Burela, a partir das 16:00
horas.
OS ESTOUPA-CALDEIROS
Son a simboloxia
práctica da festa e a diversión garantidas. Este
grupo de amig@s fan medrar a ilusión polo achegamento
natural á tradición, á música das baiucas, en
definiva un expoñente claro da "música tabernaria".
Tentarán garantir a continuidade da festa dende
a carpa, por suposto o máis achegado posible ao
bochinche. Voces, gaitas, percusión, violín e
acordeón son o cóctel perfecto para a benvida
sonora dos estoupa-caldeiros.
RUOTE
O grupo con música
para todo tipo de público. Interpretan fielmente
as melodías que recolleron por todo o país. O
seu repertorio está composto por esas pezas musicais
que conseguen facerse permanentes, porque son
transmitidas espontaneamente entre vellos e novos.
Uns cantarán con eles aquela canción que aprenderon
de nenos; outros escoitarán no escenario unha
peza que xa tiñan ouvido dos labios familiares.
Son os de Ruote,
que recuperan patrimonio etnográfico desde 1991
e que en 1996 decidiron constituír tamén un grupo
musical para interpertar ese tesouro.
Todo isto á beiriña
do Mar. Na Marosa.
MERCEDES PEÓN
LIBERA A FORZA DOS
SENTIMENTOS
QUE ENSALZAN O MEU
ESPÍRITO
Estas son as palabras
coas que nos recibe a artista nada máis abrir a
cuidadísima caixa do seu primeiro disco.
Unha muller que se
manifesta orgullosa e agradecida:
"Desde o meu corazón,
sinto un enorme agradecemento. Por todo o que recibín:
sabedoría dun pobo, amor dunha familia, amizade
de moitos de vós".
Así é Mercedes Peón,
a artista galega que impactou en toda Europa coa
música de ISUÉ (mellor disco do ano nas listas da
Folkworld; Top Dez en songline; Artista Revelación
na TVG e considerada a segunda Mellor Artista de
Europa pola BBC).
Agora preséntanos
AJRÚ, un disco máis rítmico, con maiores sonoridades
que o anterior. Mais, que ninguén se engane: Mercedes
Peón chega á Marosa coa mesma vitalidade de sempre...
e con ela virá unha banda impresionante, por non
decir de luxo que nos deleitará con un espectáculo
grandioso.
A MATRACA PERVERSA
O público da Marosa
leva varios anos dando mostra de grande capacidade
de resistencia. Quen non lembra a intensidade
do fin-de-festa cos Diplomáticos? E cos de Lamatumbá
ou o Jarbanzo Negro? Coa madrugada chega o momento
da entrega total. A mocidade vibra ao son dos
mellores músicos do país. E este ano non vai ser
menos. Iso foi o que nos prometeron uns mozos
da Estrada e de Santiago aos que lles deu por
montar un grupo de nome rechamante: Matraca Perversa.
A matraca ou carraca
fará xirar os pés das bailadoras e bailadores que
de seguro estarán impacientes de abordar os ritmos
rápidos ao tempo que saborean as participativas
letras.
A QUEIMADA
Xa van alá oito
anos de purificación etílica, o primeiro gran
queimador da festa da Marosa e polo tanto queimador
de honra Nando Blas deu paso a outros conxuros
como o das terras de Bretoña (do noso benquerido
Lugnasad), para voltar ás terras de Cervo con
Xosé Vicente. Este último queimador, gran amante
do teatro e a cultura en xeral, será o encargado
este ano da chama da apreciada queimada da Marosa.
Cen litros de líquido
elemento encheran as cuncas en barro de Buño para
berrar en conxunto, LUME!!!
A RE-FESTA
A parte máis improvisada
da noite; cando parece que todo remata é cando
comeza a verdadeira festa. A catarse do salitre
cantábrico interaccionando cos efluvios de festa
fan que aparezan na carpa, mentres que os técnicos
recollen o escenario, melodías de gaitas, pandeiretas,
bombos, clarinetes. A xente do público sempre
ven arranchada con algún elemento capaz de trasmitir
emoción e polo tanto nunca é sabido a que hora
remata a festa, o que vos podo garantir é que
ver amencer na praia da Marosa é moito máis sinxelo
do que un pensa. Simplemente tendes que deixar
levarvos pola música para gozar co saber do povo.
|
